Opolisi otayi kongo ongundu yaalumentu mboka ya dhipaga omukalimo gwomOvenduka Patrick Hawala Hamupanda (31), ngoka a tseyika nawa nedhina Waka, konima sho a yahwa nokutetwa sigo omeso kaalumentu taku tengenekwa ye li puyatano sha ningwa komatango gOsoondaha, moKatutura.
Otaku hokololwa kutya okwa ponokelwa kaafekelwa mboka sha ningilwa mepandaanda lyedhina Mungunda Street.
MOmaandaha aapolisi ya homata, melongelokumwe nopolisi yoshilandopangelo osho wo omahangano goosekuliti, okwa li ya pata uupitilo wokuya nokuza molukanda lwaRocky Crest okuza omutenya sigo okomatango, ashike nando ongaaka inashi yela ngele pamwe oshi na ekwatathano nolukongo lwaafekelwa ya dhipaga Waka.
Ohela opolisi oya pititha omadhina gaalumentu yane mboka taya tamanekelwa olunyala medhipago lyaWaka.
Aafekelwa mboka otaku hokololwa ya nika oshiponga noshigwana osha londodhwa opo kaashi ninge onkambadhala yoku ya kwata po yoyene, yo ya tseyithile opolisi meendelelo uuna ya tseya uuyelele kombinga yaampoka ye li.
Aafekelwa mboka yane oyo Lukas ‘Big Show’ Nghishekwa, Festus ‘Vuxxa’ Nehemia, Wilhelm ‘Lavas’ Modestus osho wo Kleofas Amutenya.
Ngoka e na uuyelele waampoka pu na aafekelwa mboka otaya indilwa ya tseyithile omupevikomufala Chrispin Mubebo konomola yongodhi 081 268 8888, nenge omukonakoni omukuluntu, inspekta Simeon Nghilalulwa konomola yongodhi 081 256 0988, nenge ya tseyithile kehe oshitaasi shopolisi shi li popepi.
Waka okwa yambukile kOkalongo moshitopolwa shaMusati, naapambele ye oya tseyithilwa nale onkundana yoluhodhi.
Omakonakono gopolisi otaga pula komeho.
