Omlumentu omuKenya gwomimvo 47, okwa tulwa miipandeko oshiwike sha zi ko moRundu sho a adhika niimaliwa yiifundja yomafo goodola dhaAmerika.
Omufekelwa ngoka okwa tulwa miipandeko mEtitatu, sho taku hokololwa a ningi onkambadhala yokupingakanitha oodola dhaAmerika US$1 300 opo a pewe oshimaliwa shaNamibia.
Omukwatakanithi gwomakonakono giimbuluma moshitopolwa shaKavango Uuzilo, omupevikomufala Bonifatius Kanyetu okwa koleke oshiningwanima shoka.
Kanyetu okwa popi kutya omufekelwa otaku hokololwa a yi mositola yi li moRundu, nokwa pula opo a pingakanithe ooUS$1 300 ye a pewe ooN$23 000, ashike omupya omunene oongoka kutya omukuluntu mositola ndjoka okwa dhimbulula kutya iimaliwa mbyoka kayi shi yoshili, nonkene okwa yakeleko opolisi. “Omufekelwa ngoka okwa li a ningi onkambadhala yokuza mo mositola ndjoka a fadhukepo, omanga oshimaliwa she shi li komukuluntu gwositola, ashike opolisi oye endelele noye shi pondola oku mu tula miipandeko,” osho Kanyetu a popi ngaaka. Okwa popi kutya omufekelwa okwa patelwa mopolisi yoshitaasi shaRundu kohi yoveta yokuya moshipala Oveta yonomola 2 yo1998 yombaanga yaNamibia, osho wo okukala noshimaliwa shiifundja. Pethimbo a ningilwa omapulapulo kopolisi, omufekelwa okwa popi kutya moNamibia okweya mo momasiku 13 Auguste okuza koSouth Africa nokwa kala ta zi mohotela.
Pauyelele wa gandjwa komufekelwa, Kanyetu okwa popi kutya moNamibia okwa adhika owala ta piti mo molwashoka oku uka koZambia.
Iimaliwa yomafo yaAmerika mbyoka kwa li e na okwe yi kuthwa kopolisi.
Omufekelwa okwa holoka mompangu yamangestrata gwaRundu, mEtitano.
