Omukiintu gwomimvo 21 otaku hokololwa a pondo omwanakadhona gwomimvo ntano nolwanima okwi imangeleke, sha ningilwa megumbo tali adhika molukanda lwedhina Old Ombili, mOtjiwarongo.
Omukiintu ngoka okwa hololwa kutya oye Hileni Virere noshiningwanima shoka osha ningwa komatango gOlyomakaya.
Pauyelele wa gandjwa komupopiliko gwopolisi moshilongo, omupevikomufala Kauna Shikwambi, oshiningwanima shoka otaku fekelwa sha ningwa pokati kotundi 16h50 no17h00.
“Manga oshiningwanima shoka inaashi ningwa, kuume kanakusa okwa li ta dhengele Virere ongodhi ashike ina kutha po ongodhi ye.
Okwa kwatwa komalimbililo nokwa tokola a ye kaandjawo. Sho a thiki kegumbo okwa kundwa kezimba edhigu nokwa tokola a tseyithile opolisi,” osho Shikwambi a popi ngaaka.
Aapambele yoonakusa oya tseyithilwa nale onkundana yoluhodhi, nomakonakono gopolisi otaga pula komeho.
Pokati mpoka, omulumentu gwomimvo 37, Kapumba Nepemde otaku hokololwa a mana oondjenda sho a pile megumbo omanga kwa li a mangelwa kombete nelyenge. Oshiningwanima shoka osha ningwa ongulohi yOlyomakaya momukunda Eenkundi moshitopolwa shaMusati.
Omukwatakanithi gwomakonakono giimbuluma moshitopolwa shaMusati, omupevikomufala Malakia Simaho okwa popi kutya Nepembe, ngoka e na uunkundi wopamadhiladhilo, osho wo aanona yatatu [gumwe oku na omimvo mbali, omukwawo omimvo 10 osho wo gumwe e na omimvo 11] okwa li ya thigwa megumbo kaakuluntu yawo mboka kwa li ya ya kohango kegumbo lyontumba.
“Nakusa okwa thigwa a mangelwa kombete nelyenge mondunda ye yokulala, sho aakuluntu ya yi kohango. Lwopotundi 20h00, aakwashigwana mboka ya li puundingosho wu li popepi oya dhimbulula omulilo gwa tema megumbo ndyoka noya tondokele ko.
Sho ya thiki oya adha nale ondunda ndjoka ya li nakusa, yi li kohi yomulilo. Inaya vulu okuninga po sha opo ye mu hupithe nonkene okwa pi po thilu,” osho Simaho a popi ngaaka.
Omakonakono gopolisi otaga pula komeho.
