Omukalimo gwomOshivelo moshitopolwa shaShikoto okwa tulwa miipandeko mOsoondaha sho taku hokololwa a adhikilila ta landitha onyama yuudhila wa yooloka, moka wumwe wa kangwa omanga wumwe owa telekwa momeya.
Omupopiliko gwopolisi yaShikoto, Ellen Nehale, okwa koleke onkundana ndjoka nokwa popi kutya omufekelwa okwa holoka mOmpangu yaMangestrata gwaTsumeb mOmaandaha nokwa pewa oboloha yooN$5 000.
Nehale okwa popi kutya omufekelwa ngoka oye Josephine Johannes, nokwa taalela oshipotha shokukala nonyama yuudhila wa gamenwa koveta omanga keena omukanda.
Nehale okwa popi kutya omukiintu ngoka okwa adhikilila ta landitha uudhila we puundingosho wopoCasablanca momudhingoloko gwaShivelo pethimbo lyoshikonga shomonanguwi shoka kwa li sha ningwa kaanambelewa yetonatelo lyomidhingoloko osho wo opolisi.
“Omufekelwa okwa adhika noonkanga ntano, omakonkola 33, noonguti omugoyi,” osho Nehale a popi ngaaka.
Oshipotha she oshu undulilwa komasiku 17 Auguste 2023, notaku ningwa omakonakono ga gwedhwa po.
