Uumbudhi mboka kwa li wa popiwa komukalimo gwomoWalvis Bay, Azaan Madisia konima sho Shanon Wasserfall (21) a kana muApilili 2020, itawu vulu okulongithwa onguumbangi kutya Madisia oye a dhipaga Wasserfall, osho omupanguli gwomOmpangu yoPombanda, Christie Liebenberg a popi ngaaka pethimbo e ekelehi oshipotha shedhipago shoka Madisia namumwayina Steven Mulundu, kwa li ya taalela.
Nonande Madisia okwa li a fundju sho a li ta kambadhala okuyelitha nkene Wasserfall a kana, ishewe uumbangihokololo mboka a gandja mompangu pethimbo lyiihokolola “kawa li wu ukilila ishewe kawa li tawu vulu okwiitayelwa”, onkene epangelo lya ndopa okugandja uumbangi mboka tawu vulu oku ulika kutya eso lya Wasserfall olye etwa kuMadisia, osho omupanguli Liebenberg a popi ngaaka.
Liebenberg okwa popi kutya oshipotha shedhipago shoka Madisia (31), namumwayina Mulundu (25) kwa li ya taalela okwa li owala shi ikwatelela kehokololo ndyoka lya gandjwa kuMadisia.
Omupanguli Liebenberg okwa popi kutya molwashoka ehokololo ndyoka lya gandjwa kuMadisia olyo alike tali longithwa nometamaneko lyedhipago lyaWasserfall, ompangu inayi pewa uumbangi kutya Madisia oye a kutha Wasserfall omwenyo, nonkene itayi vulu okutokola pakufekela kutya oye e mu dhipaga.
Okwa popi tati: “Uuna kaapuna uumbangi wa gandjwa kepangelo okwe ekelahi uumbangihokololo wa gandjwa [kuMadisia], nonande [Madisia] okwa gandja uumbangi inaawu yela notawu kondjithathana, onkene itaatu vulu okutya okwa fundja.”
Madisia okwa li a lombwele ompangu kutya ye nakuume ke Wasserfall okwa li ya kondjo mondunda yaMadisia moWalvis Bay momasiku 10 Apilili 2020, konima sho ya li yu uhala pamwe esiku ndyoka.
Muumbangihokololo we Madisia okwa lombwele ompangu kutya Wasserfall okwa mana oondjenda sho i idhenge omutse gwe mekuma lwanima sho u undulwa kuMadisia nokugwa kombete.
Madisia okwa lombwele natango ompangu kutya okwa li a tila nokwa dhengele mumwayina gwe opo e ye kondunda ye e mu kwathele molwashoka Wasserfall okwa li ta monika a fa a mana oondjenda.
Okwa hokolola kutya ina dhengela opolisi nenge oambulansa molwashoka okwa li a tila okupulwa omapulo ogendji kombinga yaashoka sha ningwa po, nokuza mpoka okwi indile Mulundu e mu kwathele okukutha mo omudhimba gwaWasserfall mondunda ye.
Madisia okwa popi kutya ye pamwe naMulundu oya tula omudhimba kekoto lyoshihauto, noye ke gu fumvika pehala lyoondundu tali adhika popepi nehala lyoositola dhoDunes Mall moWalvis Bay.
Petameko, Madisia okwa li a fundju kutya Wasserfall okwa li a zi mo mondunda ye momasiku 10 Apilili 2020 – e mu thigile okanona ke – ashike ina galuka we.
Wasserfall okwa kala a kana uule woomwedhi hamano nolwanima opolisi oya yakula uutumwalaka wopangodhi – mboka wa tumwa kuMadisia – tawu tseyitha mpoka a fumvikwa.
Liebenberg okwa popi kutya kapu na uumbangi mboka tawu ulike kutya Madisia oye a dhipaga Wasserfall nokwa li e shi ningile owina.
Liebenberg okwa popi kutya Madisia naMulundu oya monika ondjo yokuya moshipala uuyuuki sho ya ka fumvika omudhimba.
Madisia okwa li a kalelwa po kuhahende Albert Titus omanga Mulundu okwa li a kalelwa po kuhahene Tanya Klazen.
Epangelo okwa li lya kalelwa po komupevitamanekindjayi Henry Muhongo.