Omunashipundi gwaaleli mongundu yoSwapo Frans Kapofi okwa popi kutya uulingilingi woombumbo moshikondo shoohi mboka ngashingeyi wa tseyika nawa nedhina Fishrot, kawu shi oshinima shongundu yoSwapo.
Ndhoka Kapofi okwe dhi popi pethimbo lyoshigongi shoSwapo shoka sha ningulwa momudhingoloko gwaJohn Pandeni mOvenduka, Olyomakaya ya zi ko.
Kapofi, ngoka wo oye minista gwetanga lyegameno, okwa popi kutya oohandimwe mboka ye na olunyala moFishrot oyo naya taalele oshikumungu shoka shoFishrot nonkene inashi kala tashi pelwombedhi nenge uusama ongundu ayihe.
Aafekelwa moshikumungu shoFishrot omwa kwatelwa iilyo yoSwapo mbyoka ya li oominista dhoKabinete – minista gwoohi noonzo dhomefuta Bernhard Esau osho wo ngoka a li minista guuyuuki Sacky Shanghala.
Oombumbo dhomoshipotha shoka shoFishrot okwa li wo dha futwa aanapolitika naanangeshefa sho taku hokololwa kutya oya li ya gandja omikanda dhokuyula oohi kehangano lyokoIceland lyedhina Samherji opo li yule oohi mefuta lyaNamibia.
“Otwa mona iihuna omolwiinima yimwe mbyoka ya ningwa . . . oFishrot nenge oshinima sha fa shoka. Otashi ka kala ngiini oshinima shoSwapo ngele atuheni mpaka katu na mo olunyala moFishrot?”
Kapofi okwa gwedha po tati: “Tse katwa li mo. Atuheni otu na omadhina. Ngele oKapofi, nena oKapofi ashike, ndele keshi Swapo. Omolwashike ku na okutiwa oSwapo?”
Kapofi okwa popi kutya aakwaSwapo inaya kala nande ya sa ohoni okupopila ongundu yawo.
Okwa popi kutya aakuluntu moSwapo oye mu lombwele kutya ohaya kala taya umbwa omalaka momalukanda notaya mbandamekwa shi na sha nofishrot.
Minista okwa popi kutya oongundu dhoompilameno nadho otadhi kondjitha wo oku umba ko Swapo koshipundi ashike nando ongaaka otaya mbembeleke owala oshigwana molwashoka okulela.
“Oshike taya ka eta po shoka inaatu shi ninga nale?” osho a pula ngaaka.
Kapofi okwa londodha iilyo yongundu yawo kutya naya kale ye na eikwato pomutima molwashoka opu na aantu oyendji taya thigi po ongundu yoSwapo, nolundji kehe ongundu ompe tayi totwa po ohayi faalele Aakwaswapo.
Okwa popi kutya nonande piigongi yoSwapo aluhe ohapu kala engungo enene lyaalanduli naayambidhidhi onkene ongundu yawo tayi ka sindwa ngele inapu ningwa sha meendelelo okukaleka po aayambidhid.
“Ashike mpaka otatu dhengwa mo kukehe ongundu tayi ya po, ohayi tu kutha aantu. Ano otwa yona shike?” Kapofi okwa popi kutya nonande onkene ongundu yoSwapo hayi kala nokusindana momahogololo, iilyo yongundu oyi na okukala yi na eikwato pomutima nonkene “oya pumbwa lela okuninga po sha mongundu”.
