Kamatyona gwomimvo 15 otaku hokololwa a dhengagulwa koosekuliti ndhoka dha li tadhi keelele omaliko nokukaleka po elandulathano pomauliko giipindi gondolopa yEenhana ngoka ga li ko ehuliloshiwike lya piti, nokwa monithwa oshiponga molwashoka anuwa okwa ningi onkambadhala yokuyakela kuume ke meni lyomaulikilo.
Omukwatakanithi gwomakonakono giimbuluma moshitopolwa shaHangwena, Zachariah Amakali, okwa koleke oshiningwanima shoka nokwa gwedha po kutya oshi li kohi yomakonakono gopolisi.
Kamatyona ngoka, edhina lye itaali tumbulwa molwashoka omushona, okwa hokolola kutya ongulohi yEtitano okwa pewa kuyina oshimaliwa shooN$20 opo a ka fute pomweelo a vule okuya momauliko giipindi molwashoka okwa li a hala oku ka tala aahikingalo mboka kwa li taya mweneke ongulohi ndjoka.
Okwa hokolola kutya molwashoka kuume ke ngoka a li naye, kali e na oshimaliwa shokufuta pomweelo, oyu uvathana opo gumwe a fute nokupita a ye meni ye a vule okugandja okatekete moompangulushushu ano okupitila mondhalate kwaangoka e li pondje opo a vule okuya meni.
“Omanga ndi li pondhalate yolugumbo, sekuliti gumwe okwe ya pungame ta pula kutya pondhalate otandi ningi po shike. Onde mu yamukula kutya onda tega kuume kandje opo ndi mu pe oshimaliwa. Okwa tameke okulombwela ndje kutya nandi popye oshili molwashoka okuwete tandi fundju. Okuza mpoka onda zimine nonde mu lombwele oshili. Shoka oshe ta a lombwele ndje kutya ota longo ndje oshilongwa [ta dhenge ndje] opo onkambadhala nda ningi kaandi yi elekele we. Okwa kutha mo ongola ye nokwa tameke okudhenga ndje momutse nomolutu. Onda thikama po nonkambadhala yokufadhukapo, ashike aaniilonga pamwe yoosekuliti oya kwata ndje nokutameka taya dhenge ndje, nokuthanga ndje. Onda tameke tandi zi ombinzi, ashike inaya etha ndje oya tsikile owala nokudhenga ndje,” osho kamatyona a popi ngaaka.
Okwa popi kutya oosekuliti mboka oye etha owala oku mu dhenga sho opolisi ye ya puyo noku ya lombwela ye mu ethe.
Yina yakamatyona ngoka okwa popi kutya oshiningwanima shoka okwe shi lopota kopolisi.
“Itashi vulika ya kambadhale okudhipaga omumwandje omolwoshimaliwa shooN$20. I ipula owala okanona ka dhengwa sigo omonkalo ndjoka, omuntu ota dhengelwa shike momutse peha lyoku mu tidha mo molugumbo lwomauliko giipindi?” osho a popi ngaaka.
Omupopiliko gwondolopa yEenhana, Paul Shilongo okwa popi kutya elelo lyondolopa olya lopotelwa iiningwanima yopaali ya yooloka moka aakwashigwana yaali ya dhengwa koosekuliti pethimbo lyomauliko giipindi mehuliloshiwike.
Okwa popi kutya, nando ongaaka, elelo lyondolopa yawo inali gandja nande elombwelo lya sha komuntu, mwa kwatelwa ehangano lyoosekuliti, opo ku dhengwe aantu mboka itaaya iyutha komilandu nokoompango dhoshituthi shomauliko giipindi.
“Elelo lyondolopa okwa li lya gandja oshinakugwanithwa kehangano lyoosekuliti lyedhina Omle Security opo li kaleke po elandulathano negameno lya kehe gumwe osho wo lyomaliko. Kehe omuntu teya momauliko giipindi okwa li ta pulwa ofuto pomweelo,
noha zalekwa okapaya kokwaako ongendhindhiliko kutya okwa futa, nokapaya hoka iha ka vulu okutaambathanwa. Ondi wete kutya kamatyona ngoka okwa li a kwatwa ta kambadhala okugandja okapaya ke komuntu gulwe [e li kondje yolugumbo] okupitila mondhalate,” osho Shilongo a popi ngaaka.
Oonkambadhala dhokudhengela elelo lyOmle Security, opo li tye ko sha odha hulile muunyengwi molwashoka sho ya dhengelwa lwoshikando shotango, ongodhi oye yi dhenge po, nolwanima oya tokola kaaya yamukule we ongodhi sho taya dhengelwa.
